Dita e Pastrimit Digjital është një nismë globale që synon të rrisë ndërgjegjësimin për ndotjen dixhitale dhe inkurajon individët dhe kompanitë të pastrojnë dhe organizojnë praninë e tyre online. Sot, në bashkëpunim me Let’s Do It World, organizata jonë po organizon këtë event në Kosovë dhe ju ftojmë të bëheni pjesë e kësaj nisme të rëndësishme.

Pse është e rëndësishme të marrim pjesë?

•Reduktimi i emetimeve të CO2: Pastrimi digjital ndihmon në uljen e energjisë të nevojshme për të ruajtur dhe procesuar të dhënat, duke kontribuar në reduktimin e ndotjes dixhitale dhe emetimeve të CO2.

•Përmirëson jetëgjatësinë e pajisjeve: Pastrimi i smartphone-ve dhe kompjuterëve nga aplikacionet dhe skedarët e panevojshëm përmirëson performancën e tyre.

•Siguria e të dhënave: Fshirja e skedarëve të vjetër ose të panevojshëm e rritë sigurinë.

•Hapësirë më e madhe: Pastrimi i fotografive, videove dhe email-eve të panevojshme liron hapësirë në pajisjet tuaja.

Si të bëheni pjesë?

1.Fshini Fotot dhe Videot e Panevojshme: Nisni duke pastruar fotografitë dhe videot që nuk ju duhen në telefonat tuaj.

2.Pastroni Email-et: Fshini të gjitha email-et e panevojshme dhe abonimet që nuk ju sjellin vlerë.

3.Pastroni Pajisjet Digjitale: Vazhdoni me pastrimin e kompjuterit dhe pajisjeve të tjera dixhitale.

4.Ndani përvojën: Përdorni hashtagun #DigitalCleanupDayKosova për të treguar përvojën e juaj dhe për të inkurajuar të tjerët.

Kjo nismë jo vetëm që na ndihmon të organizojmë jetën tonë dixhitale, por gjithashtu kontribuon në një botë më të pastër dhe më të gjelbër. !