Let’s Do It vazhdon monitorimin e raportimit të medieve për problematikat dhe çështjet mjedisore në vend

Let’s Do It ka vazhduar me monitorimin e raportimit të medieve për problematikat dhe çështjet mjedisore në vend edhe gjatë muajit nëntor.

Për muajin nëntor janë monitoruar gjithsej 27 medie elektronike. Nga këto, 19 prej tyre kanë qenë aktive në raportim të rasteve kur ka patur ndotje dhe degradime të mjedisit, shkelje mjedisore apo edhe zhvillime të ndryshme në fushën e mjedisit.

Për dallim nga muaji tetor, në nëtor kemi numër të dyfishuar të raportimeve. Gjithsej, janë bërë 148 raportime, 102 prej të cilave janë për ndotjen e ajrit e cila si problematikë aktualizohet gjatë këtyre muajve të ftoftë të vitit. 30 raportime janë bërë për ndotje të tokës, por edhe për shënime të aktiviteteve të ndryshme mjedisore që kishin në fokus mbrojtjen e saj. Ndërsa sa i përket raportimeve për ndotjen e ujit, gjatë këtij muaji janë bërë vetëm 11 sosh. Vlen të theksohet se gjatë muajit nëntor është raportuar edhe për shpyllëzim – 3 raportime, e cila si shkelje mjedisore në këtë periudhë të ftoftë të vitit lidhet me nevojën e qytetarëve për ngrohje. Gjithashtu, në nëntor është raportuar edhe për masa pozitive të ndërmarra për ruajtjen e biodiversistetit, siç është ndalimi i gjuetisë, si dhe për nevojën e aplikimit të energjisë së ripërtërishme në vendin tonë.

Në listën e medieve me më së shumti raportime, edhe këtë muaj, prin portali “Kallxo.com” me 47 raportime. Vlen të theksohet se “Kallxo.com” është i vetmi portal që ka raportuar në baza ditore shkallën e ndotjes së ajrit në Prishtinë. Më pas kemi “Ekonomia Online” me 15 raportime, “Indeksonline” me 10 raportime, “Kosova Sot” dhe “RTV 21” me 7 raportime, “Epoka e Re”, “Periskopi”, “Gazeta Blic”, “RTK Live” me nga 6 raportime, “Klan Kosova”, “Zëri” me nga 5 raportime, “Veriu Info”, “Insajderi” me 4 raportime, “Arbresh.info”, “Koha.net” me 3 raportime, “Kosovarja”, “Kosovapress”, “Telegrafi” me 2 raportime dhe “NOA” me 1 raportim.

Let’s Do It do të vazhdojë edhe më tutje monitorimin e raportimit të medieve për problematikat dhe çështjet mjedisore në vendin tonë.

Roli i medieve si mjete të komunikimit masiv është kyç në informimin e drejtë dhe ndërgjegjësimin e qytetarëve lidhur me ruajtjen dhe mbrojtjen e mjedisit në Kosovë, ndaj Let’s Do It u bën thirrje të gjitha medieve që të raportojnë sa më shumë lidhur me problematikat dhe çështjet mjedisore në vendin tonë.